- “Nun momento e nun sector en que tanto se fala de deslocalizacións, é moi positivo reivindicar o modelo contrario: o dunha empresa que non só produce, senón que constrúe; que xera industria, emprego e riqueza aquí”, di
O Porriño (Pontevedra), 20 de marzo de 2026
A conselleira de Economía e Industria, María Jesús Lorenzana, anunciou hoxe que a Oficina Económica de Galicia vai colaborar con EspazoCoop, a entidade que agrupa as cooperativas galegas, para promover o desenvolvemento e axilizar a implantación na Comunidade de iniciativas empresariais de carácter cooperativo.
Lorenzana visitou hoxe no Porriño as instalacións da empresa Maier Ferrolplast, a primeira sociedade cooperativa mixta que se fundou en Galicia e a maior cooperativa industrial, onde se formalizou a sinatura deste acordo de colaboración. Segundo establece, EspazoCoop e a Oficina Económica de Galicia van traballar da man e de xeito coordinado, de modo que poidan complementar os seus servizos de apoio e asesoramento ás persoas emprendedoras.
A Oficina Económica de Galicia do Igape comprométese, polo tanto, a atender as consultas e proporcionar asesoramento e acompañamento a emprendedores, cooperativas e outras entidades do sector que conforman o ámbito do acordo. E, pola súa banda, EspazoCoop derivará á oficina do Igape calquera proxecto que precise dunha atención que vaia máis aló dos apoios ou servizos que ofrece. Ambas as dúas manteranse en contacto permanente co fin de visibilizar o cooperativismo como fórmula de autoemprego e de emprendemento empresarial.
Na súa intervención, Lorenzana gabou o exemplo de Maier Ferroplast que, segundo dixo, dentro do sector da automoción, “non é só unha planta de produción, é un proxecto de persoas”; unha empresa onde é posible combinar o arraigo local cunha visión global e competitiva, afirmou. “Nun momento e nun sector en que tanto se fala de deslocalizacións, é moi positivo reivindicar o modelo contrario: o dunha empresa que non só produce, senón que constrúe; que xera industria, emprego e riqueza aquí”, concluíu.
