- Asegura que os investimentos destas entidades teñen “máis perspectiva, máis seguridade e máis implicación co país”
- “A empresa familiar é Galicia Calidade en estado puro”, resalta
- Este tipo de compañías representan máis do 80% de todo o emprego privado da comunidade e achegan máis do 85% da riqueza xerada en Galicia
- Compromete o apoio da Xunta para reducir a burocracia, potenciar o diálogo social e mellorar a formación para o emprego
Santiago de Compostela, 18 de novembro de 2025
O presidente da Xunta, Alfonso Rueda, puxo en valor hoxe o importante papel que xogan as empresas familiares na boa marcha da economía galega, en tanto representan máis do 80% de todo o emprego privado da comunidade e achegan máis do 85% da riqueza xerada -aportan máis de 40.800 millóns ao PIB galego-.
“Ter unha base familiar implica que os investimentos teñan moita máis perspectiva, máis seguridade e unha maior implicación co país”, indicou durante a súa participación na gala do XXV aniversario da Asociación Galega de Empresa Familiar (AGEF), que integra ás 60 principais compañías familiares da comunidade autónoma.
Durante a súa intervención, o titular do Executivo galego comprometeu o apoio da Xunta para seguir impulsando a actividade económica destas empresas e, en xeral, de todo o tecido produtivo. “Os empresarios xeran riqueza e emprego e explican en gran parte o futuro dun país”, salientou, á vez que recoñeceu o papel das empresas familiares á hora de difundir “a marca Galicia, todo o que se fai aquí”. “A empresa familiar é Galicia Calidade en estado puro”, resaltou.
Entre as medidas de apoio ao sector, Rueda resaltou o compromiso da Xunta por reducir e axilizar a burocracia -a través de medidas como a futura Lei de administración ambiental simplificada ou da Oficina Económica de Galicia-; a aposta por reforzar o diálogo social, que se está traballando en institucionalizar por primeira vez a través dun decreto; ou o impulso á formación para o emprego, a través de diversas medidas para flexibilizala e adaptala ás necesidades reais das empresas.
