A comunicación interna é un dos piares do bo funcionamento dunha empresa, pero tamén un dos ámbitos que máis se descoidan nas pemes. A falta de tempo, a confianza excesiva en que “todos se entenden” ou a ausencia de procesos claros fai que, en moitos casos, a comunicación se xestione de forma improvisada.
Con todo, unha comunicación interna pouco eficaz pode xerar erros, confusión, desmotivación e perda de produtividade. Identificar os fallos máis comúns é o primeiro paso para mellorala e converter a comunicación nunha verdadeira ferramenta de xestión.
Estes son algúns dos erros máis habituais na comunicación interna das pemes.
1. Dar por feito que a información xa se entende
Un dos erros máis frecuentes é asumir que o equipo comprende perfectamente as indicacións ou decisións simplemente porque se comunicaron unha vez. Mensaxes pouco claras, incompletas ou demasiado técnicas poden dar lugar a interpretacións distintas.
Podemos evitalo empregando unha linguaxe clara, confirmar que a información foi entendida e facilitar exemplos cando sexa necesario.
2. Comunicar só cando xorde un problema
Moitas pemes só se comunican internamente cando hai incidencias, cambios urxentes ou conflitos. Isto fai que a comunicación se perciba como algo negativo ou asociado a erros.
Para cambiar esta forma de facer o mellor é manter unha comunicación regular, tamén para compartir obxectivos, avances ou recoñecer o traballo ben feito.
3. Non definir canles nin responsabilidades
Utilizar múltiples canles sen criterio, mensaxes, correos, chamadas, conversas informais, ao contrario do que se pensa, pode provocar que a información se perda ou non chegue a quen corresponde.
Para reducir estas situacións o ideal é establecer canles claras segundo o tipo de información e definir quen comunica que e cando.
4. Non escoitar ao equipo
A comunicación interna non debe ser unidireccional. Ignorar as opinións, dúbidas ou propostas do equipo reduce a implicación e pode xerar desmotivación.
Para potenciar esta acción é recomendable crear espazos para a escoita activa e fomentar unha comunicación bidireccional, na que o equipo tamén poida participar.
5. Pensar que a comunicación interna non é prioritaria
Algunhas pemes consideran que a comunicación interna é secundaria fronte a outras tarefas máis urxentes. Con todo, unha mala comunicación adoita estar detrás de moitos problemas operativos.
Isto pódese mellorar entendendo a comunicación como parte da xestión diaria do negocio e dedicar tempo a planificala, aínda que sexa de forma sinxela.
Un pequeno cambio cun gran impacto
Mellorar a comunicación interna non require grandes recursos, senón conciencia, organización e vontade de mellora. Evitar estes erros axuda a crear equipos máis coordinados, eficientes e comprometidos.
Dende a Oficina Económica de Galicia ofrécese orientación ás pemes e persoas autónomas para fortalecer a xestión empresarial, incluíndo aspectos clave como a comunicación interna, fundamental para o crecemento e a competitividade do tecido empresarial galego.
