Na era dixital, as redes sociais convertéronse en ferramentas imprescindibles para a comunicación, o márketing e a construción de marca. Con todo, moitas empresas cometen o erro de querer estar presentes en todas as plataformas, crendo que así aumentarán o seu alcance e visibilidade. Na práctica, isto supón un uso indebido de tempo e recursos.
Cada rede social ten o seu público obxectivo, polo que é fundamental coñecer cales son as características de cada unha e a quen se dirixen para realmente conectar cos clientes e crear unha comunidade sólida.
Segundo Datareportal, existen máis de 5.210 millóns de usuarios activos de redes sociais, o que representa case o 65% da poboación mundial. O uso e a preferencia varían de maneira significativa segundo a idade, polo que escoller ben a canle é determinante.
1. Facebook
Aínda que moitas veces se pensa que perdeu forza, Facebook segue sendo a rede social con máis usuarios activos no mundo, superando os 3.070 millóns en 2025.
O público principal concéntrase en persoas adultas, especialmente entre os 25 e 44 anos, aínda que tamén mantén unha presenza destacada entre maiores de 45. Isto fai que sexa unha canle idónea para empresas que se dirixen a un público adulto consolidado.
Vantaxes principais:
- Segmentación moi precisa grazas a ferramentas como Audience Insights.
- Integración co ecosistema de META, o que facilita xestionar campañas conxuntas con Instagram e WhatsApp.
- Potencia a visibilidade da marca e crea comunidades estables arredor dela.
2. Instagram
Instagram mantén un crecemento sólido e consolidouse como a segunda plataforma máis utilizada, con máis de 2.500 millóns de usuarios en 2025.
É unha rede centrada no contido visual e resulta especialmente útil para marcas que queiran mostrar os seus produtos ou servizos de maneira atractiva. A maior parte da súa audiencia sitúase entre os 18 e os 34 anos.
Beneficios clave:
- Favorece a construción dunha identidade de marca visual forte.
- Permite xerar tráfico desde as publicacións cara á páxina web.
- É óptima para promocionar produtos de forma directa e atraer a clientes potenciais a través de contido visual.
3. TikTok
TikTok é a rede social que experimentou o maior crecemento nos últimos anos, converténdose nunha das plataformas con máis tempo de uso por parte dos usuarios.
En 2025 consolidouse como a preferida polas xeracións Z e Alfa, cun formato que favorece a creatividade e a viralidade mesmo en contas pequenas. A plataforma conta cunha base de arredor de 1.600 millóns de usuarios activos.
Puntos fortes:
- Facilita a creación de contido entretido, orixinal e auténtico.
- O seu algoritmo potencia o alcance de contido novo e relevante.
- Os usuarios responden mellor a marcas que transmiten unha imaxe próxima e humanizada.
Non se trata de estar en todas partes, senón de estar onde realmente importa. Escoller as redes sociais adecuadas segundo o teu público é clave para aforrar tempo, esforzo e cartos, pero sobre todo para conectar de verdade coa xente que queres atraer.
Analiza quen é o teu público obxectivo, como se comunica, en que plataformas pasa máis tempo e que tipo de contido consome. A partir de aí, aposta polas canles que mellor se adapten á realidade da túa marca.
Porque unha boa estratexia non consiste en estar en todas as redes sociais, senón en destacar nas que mellor encaixan coa túa empresa.
Se tes dúbidas sobre a xestión das redes sociais do teu negocio, non o dubides e solicita o asesoramento gratuíto da Oficina Económica de Galicia.
