Vivimos nun mundo cada vez máis dixitalizado, no que a Intelixencia Artificial chama á porta con forza e ameaza con substituír ao ser humano en moitas tarefas. É xustamente neste contexto tan “tecnolóxico” cando as feiras profesionais adquiren un papel crucial e axudan a “humanizar” as oportunidades de negocio, así como a xestión e construción de relacións interpersoais tan importantes para o avance dos proxectos. A multitude de ferramentas dixitais dispoñibles para a comunicación non deben excluír a conexión persoal, que segue sendo determinante para as empresas.
Estes eventos son sempre citas sectoriais que congregan expertos en distintas áreas. É importante percibilas como un punto de encontro profesional que, se se xestiona ben, achega moitas vantaxes a todos os que necesiten fortalecer e ampliar a súa rede de contactos, así como atopar novos nichos de mercado e outros horizontes profesionais.
Aínda que tamén hai detractores e non faltan opinións que din que nun mundo onde case todo se pode facer a través dun ordenador estes encontros carecen de sentido, eu opino todo o contrario. Canto máis virtual é todo, máis necesaria se fai a mirada humana.
Vantaxes de acudir en persoa ás feiras profesionais
Tras deixar claro o meu punto de vista, fago un repaso polas vantaxes de participar en feiras, workshops, congresos e encontros profesionais:
- Networking e captación de contactos: Un dos principais beneficios de asistir en persoa ás feiras é a posibilidade de establecer contacto con outros profesionais do sector, de difícil acceso noutro contexto. O cara a cara axuda a xerar confianza e contribúe a crear relacións máis sólidas, xerar empatía e establecer vínculos sinceros e duradeiros. Ademais, nas feiras profesionais sempre hai espazo para manter conversas informais, onde a afinidade pode xurdir dunha maneira máis natural.
- Escaparates de tendencias e espazos de innovación: As feiras son escaparates onde se amosan as últimas tendencias dos distintos sectores. Son tamén espazos nos que conviven empresas emerxentes e emprendedores que acoden para dar visibilidade a produtos e servizos novidosos e innovadores, xunto con grandes marcas xa consolidadas que buscan ideas e aire fresco. A interacción entre ambas permite aos asistentes manterse actualizados e posicionarse na vangarda do seu sector.
- Oportunidades de negocio e vendas: Para moitas empresas, estes eventos son unha excelente oportunidade para pechar acordos comerciais, acceder a novos clientes e ampliar a súa presenza en determinados mercados. A interacción directa con potenciais compradores permite adaptar a oferta e, ao mesmo tempo, responder con eficacia ás súas necesidades.
- Aprendizaxe e formación: Moitas feiras e citas similares, ademais da parte expositiva, contan tamén cunha sección de conferencias, seminarios e mesas redondas nas que expertos do sector expoñen temas de interese e actualidade, ademais de casos prácticos. Estas actividades permiten aos asistentes ampliar coñecementos, adquirir novas habilidades e tomar o pulso á industria.
- Visibilidade e posicionamento de marca: A participación en feiras non só fortalece a imaxe da empresa e afianza as estratexias de branding, senón que tamén contribúe a posicionar as marcas como referentes no seu sector. A interacción persoal con clientes, a análise da competencia e o contacto con expertos axudan a reforzar a credibilidade, dar forma ás estratexias internas e xerar confianza no mercado.
Unha vez decidida a presenza nunha feira, convén traballar moi ben a preparación para a mesma: o deseño dos stands segundo os obxectivos marcados, elaborar unha boa axenda de citas e programar as reunións, levar o material necesario para as presentacións… e deixar tempo libre para facer novos contactos comerciais e ver como se presentan outras empresas.
En conclusión, asistir a feiras profesionais é unha acción clave para impulsar o crecemento e o éxito dunha empresa en distintos sectores. Nestes eventos non só se aprende e se descobren oportunidades, senón que o máis importante é que fomentan as relacións humanas, que seguen sendo esenciais no ámbito empresarial. Nun mundo cada vez máis dixitalizado, a interacción con persoas de carne e óso segue marcando a diferenza.
Aproveita os servizos da Oficina Económica de Galicia e busca asesoramento para impulsar o crecemento do teu negocio a través do formulario en liña da nosa páxina web.
