En calquera contorno profesional, a maneira na que nos comunicamos ten un impacto directo na calidade das relacións, no ambiente laboral e nos resultados que obtemos. As palabras que escollemos inflúen tanto en como percibimos a realidade como na forma en que as demais persoas interpretan as nosas mensaxes.
Por iso, desenvolver unha comunicación positiva converteuse nunha habilidade esencial para mellorar a convivencia, fomentar a motivación e fortalecer os equipos.
Falar de comunicación positiva non significa agochar os problemas nin evitar os conflitos, senón aprender a expresarse dun xeito máis construtivo, centrado nas solucións e nas posibilidades de mellora. Cambiar o enfoque da linguaxe pode transformar a maneira en que pensamos, sentimos e actuamos.
A continuación recóllense cinco claves prácticas para aplicar a linguaxe positiva no ámbito laboral:
- Indica o que podes facer, en lugar do que non podes facer. Reformular unha frase negativa en termos de posibilidade cambia a percepción da mensaxe, un exemplo: no canto de dicir “Non podo reunirme pola mañá”, proba con “Podo reunirme a partir das dúas”.
- Di o que queres, non o que non queres. As peticións en positivo son máis claras e xeran menos resistencia, por exemplo: en vez de “Non deixes nada aceso”, mellor “Por favor, apaga todo ao saír”.
- Responde con concreción e coherencia. Cando a resposta é afirmativa, utiliza un “si” claro, busca sempre transmitir seguridade e empatía. Un exemplo sería: “Podo collerme o día libre mañá?” – “Si, por suposto, disfrútao”.
- Enmarca as túas mensaxes nun ton positivo. Cambiar a neutralidade ou o enfoque negativo por un recoñecemento ou agradecemento mellora a relación comunicativa. Así, no canto de “Recibín a información”, podes dicir “Grazas por enviarme a información”.
- Procura solucións, non culpables. A linguaxe orientada á resolución de problemas favorece a colaboración e evita tensións innecesarias. Deste modo, notarás diferencias cando substitúas “Esquecéches de incluír isto” por “Para completalo, sería necesario engadir…”.
Estas pequenas transformacións na maneira de comunicarnos teñen un efecto multiplicador xa que axudan a crear contornos laborais máis saudables, aumentan a confianza entre compañeiros e melloran a eficiencia colectiva.
Porque, ao final, as palabras non só comunican senón que tamén constrúen a cultura dunha organización.
Dispor dun acompañamento profesional, como o que ofrece a Oficina Económica de Galicia, pode resultar determinante para unha implantación exitosa. Aproveita o asesoramento especializado e os recursos gratuítos ao teu alcance para fortalecer o teu proxecto empresarial.
