Unha consulta habitual das empresas son as claves que deben seguir para afrontar unha estratexia de márketing e comunicación. Moitas empresas contratan servizos de márketing e de comunicación pois sóalles que son técnicas que lles axudarán a vender máis ou a darse a coñecer ante grandes audiencias ou clientes. E teñen claro que deben dedicar unha partida do seu orzamento para investir nesa liña.
O problema xorde cando lles preguntas aos responsables correspondentes que necesitan exactamente. Nese punto a maioría confesa que non teñen claro que queren facer e ignoran que as opcións ou escenarios aos que se enfrontan son variados.
Aí é onde xorde o primeiro obstáculo.
Se non se ten clara a resposta a esta primeira e básica cuestión, o investimento pode ser unha perda de diñeiro cun retorno inexistente.
Por iso aconsellamos que antes de solicitar os servizos dun consultor neste campo ou recorrer a unha empresa que nos dea este servizo é recomendable responder algunhas preguntas básicas internas que nos axudarán a saber por onde podemos tirar.
O primeiro é diferenciar. O márketing céntrase na captación de clientes mentres que a comunicación busca conquistar ao público, lograr audiencia entre perfís non necesariamente coñecedores da marca. Ambos os departamentos son complementarios e para traballar parten das mesmas premisas.
Agora, imos alá con algunhas preguntas:
- Tes clara a túa imaxe de marca?
- Coñeces ao teu “buyer person” ou cliente obxectivo?
- Sabes a quen te dirixes, onde está situado o teu cliente/público (segmento, localización xeográfica, perfil socio económico…)?
- Tes creado o teu propio storytelling?
- Controlas a túa competencia?
- Fixeches algunha vez un DAFO (Debilidades, Ameazas, Fortalezas e Oportunidades) da túa empresa?
- Que queres conseguir e a onde queres chegar?
- Tes clara a túa estratexia?
Este é un carrusel de preguntas básico, un punto de partida. As respostas son as que, unha vez analizadas, permítennos dar forma a unha necesaria estratexia.
Se tes as respostas claras quizais xa teñas unha folla de ruta definida e só faga falta plasmala sobre o papel para trazar un camiño de futuras accións. Oxalá!
Pero se non te formulaches nunca estas cuestións e ignoras as respostas, significa que traballes lanzando tiros ao aire. Iso non é operativo. Toca sentarse a pensar para trazar os alicerces dun proxecto sólido. Isto é, de forma resumida, a estratexia. O primeiro esbozo de calquera proxecto empresarial.
Tras esta primeira autoanálise para saber quen es e que queres conseguir damos o seguinte paso. Como o fago?
Aquí ábrense novas incógnitas:
- Vou utilizar o márketing ou a comunicación para conseguir vendas?
- Mellor para facer branding, é dicir, para xerar coñecemento de marca?
- Cando e en que tempo quero conseguir resultados?
O primeiro, insistir en que as campañas dirixidas a venda son moi distintas das accións destinadas a lograr visibilidade. Insisto pois é unha verdade evidente que non todo o mundo comprende.
Vender, require un coñecemento claro do mercado e das opcións de comercialización. O branding require ter unha estratexia de contidos creada e un dominio das canles onde lanzar o noso relato.
Unha vez máis as respostas son múltiples e, optemos pola venda ou pola visibilidade, tocará acotar espazos para crear o noso funil de conversión. É dicir, apuntar para dar o máis preto posible da diana.
Esta parte permitiranos definir as mellores accións de promoción. Pero ollo! É importante saber que non é posible facer unha boa campaña de promoción (de vendas ou de marca) sen unha estratexia previa ben definida.
A medida que se van tomando decisións saltan novas preguntas:
- Canto orzamento teño para facer esa promoción?
- Teño materiais audiovisuais, imaxes, contidos… que me permitan sacar o altofalante?
- Teño unha boa páxina web optimizada para conseguir o que necesito?
- Teño redes sociais e xestiónaas dunha forma profesional?
- Vou investir en publicidade de pago (ads) offline ou online?
- Teño dossieres, flyers, presentacións dos meus produtos adaptadas a provedores ou clientes? …
Si, vale, son xa demasiados interrogantes. Unha infinidade de preguntas das cales, unha vez máis, ignoras varias respostas. Iso significa que tes por diante moito traballo. E que debes entender que isto do márketing (aplicado a vendas ou a marca) e da comunicación non é algo aleatorio. Son dúas patas moi complexas deste gran polbo que é unha empresa ou un proxecto con ambición.
Pero se non identificas quen es, onde está o teu público obxectivo e que mensaxes tes que lanzar para que os teus potenciais clientes saiban que existes, te recoñezan e elixan o teu produto augúroche un futuro complexo.
Unha conclusión para finalizar. Aínda que de primeiras todo isto asuste, este é en realidade un camiño apaixonante que, se afrontas en boa compañía, seguro cambiará a forma que tes de ver e entender a túa empresa. Só necesitas un bo compañeiro de viaxe, un líder de confianza con quen percorrer esta longa e motivadora viaxe cara ao éxito.
