As persoas son o corazón de calquera empresa. E nas pemes, onde os equipos adoitan ser reducidos e os vínculos máis próximos, a cultura empresarial convértese nun factor decisivo para o bo funcionamento do negocio. Non se trata só de motivar aos traballadores, senón de construír unha identidade compartida, onde todos e todas se sintan parte dun proxecto común.
Unha cultura empresarial sólida permite atraer talento, reter aos mellores profesionais, mellorar o ambiente laboral e reforzar a competitividade. E o mellor, non require grandes investimentos, senón vontade, coherencia e compromiso por parte da dirección.
A importancia dos valores compartidos
Toda empresa ten unha forma de facer as cousas, unha personalidade que se transmite nas relacións cos clientes, na forma de traballar, nas decisións que se toman. Iso é a súa cultura e esta cultura debe sustentarse en valores claros e compartidos por todo o equipo.
Valores como a confianza, a responsabilidade, o respecto, a innovación ou a colaboración non poden quedar nun cartel na parede, deben estar presentes no día a día. Cando os valores se viven, crean coherencia interna e sentido de propósito.
Como definir os valores dunha peme?
A través de encontros ou sesións co equipo, para identificar que é o que define á empresa. Poñendo a atención no que opina o persoal, como que valoran do traballo, que cren que distingue á empresa. Deste xeito, convértense eses valores en accións concretas.
Boas prácticas de comunicación interna
A comunicación interna é o fío que une todas as partes da empresa. É clave para xerar confianza, evitar rumores, aliñar obxectivos e crear un ambiente de transparencia.
Nas pemes, onde non sempre hai departamentos específicos de recursos humanos ou comunicación, é aínda máis importante coidar esta área.
Boas prácticas que funcionan:
- Reunións breves e periódicas, onde todo o equipo saiba cara onde vai a empresa e poida achegar ideas.
- Canles claras para informar de cambios, logros, obxectivos ou dificultades.
- Espazos de escoita activa, onde o persoal poida expresar propostas ou inquedanzas sen medo.
Rituais e dinámicas que unen ao equipo
Máis alá das tarefas diarias, os momentos compartidos dan forma á cultura dunha empresa. Non hai que pensar en grandes eventos: pequenos rituais ou dinámicas poden ter un gran impacto na motivación e na cohesión do equipo.
Exemplos de rituais sinxelos pero efectivos:
- Celebrar os aniversarios ou os logros persoais e profesionais.
- Comezar a semana cun breve encontro para marcar prioridades e compartir motivación.
- Organizar un café mensual para falar informalmente de como vai a empresa.
- Crear espazos de recoñecemento (por exemplo, destacar cada mes unha acción positiva dun compañeiro ou compañeira).
Estas pequenas iniciativas xeran sentimento de pertenza e fortalecen os vínculos entre as persoas que traballan xuntas.
A cultura empresarial non se impón: constrúese día a día. E nas pemes, onde a proximidade é unha vantaxe, é posible desenvolver unha cultura baseada na confianza, na comunicación honesta e nos valores compartidos.
Na Oficina Económica de Galicia animamos ás pequenas e medianas empresas a poñer ás persoas no centro, a coidar a súa identidade como organización e a crear espazos onde cada membro do equipo sinta que forma parte dun proxecto con propósito.
Porque unha empresa con cultura é unha empresa con alma. E iso, nun mundo tan cambiante, marca a diferenza.
