A localización, o prezo do alugueiro ou a superficie adoitan ser factores decisivos á hora de escoller un local comercial ou unha nave. Sen embargo, na maior parte das ocasións, pásase por alto as características enerxéticas do inmoble que tamén poden condicionar os gastos, o funcionamento diario e a rendibilidade futura da actividade.
Abrir un negocio ou trasladar unha empresa a novas instalacións implica tomar decisións que terán consecuencias durante anos. Entre elas, a elección do espazo de traballo merece unha análise que vaia máis alá da súa localización ou distribución.
Un local aparentemente económico pode acabar resultando máis custoso se precisa importantes investimentos en climatización, presenta un illamento deficiente ou non dispón dunha instalación eléctrica adecuada para a actividade prevista.
Por iso, incorporar criterios enerxéticos á procura dun inmoble pode axudar a evitar gastos imprevistos e facilitar unha mellor planificación empresarial.
A instalación eléctrica responde ás necesidades do negocio?
Non todas as actividades teñen as mesmas necesidades enerxéticas. Unha oficina, un establecemento de hostalaría ou un pequeno taller poden presentar diferenzas importantes na potencia eléctrica que precisan e nos seus patróns de consumo.
Por exemplo, se queremos abrir un local de hostelería, debemos ter en conta que equipos como fornos, cociñas eléctricas, lavalouzas industriais, cámaras frigoríficas, sistemas de extracción ou climatización poden funcionar simultaneamente e requirir unha potencia eléctrica considerable. Ademais, algúns destes equipamentos, como as cámaras de conservación, necesitan manterse en funcionamento mesmo cando o establecemento está pechado.
No caso dunha oficina, as necesidades adoitan ser diferentes. O consumo concéntrase principalmente na iluminación, os ordenadores, os equipos informáticos, a climatización e outros dispositivos de uso diario. Neste caso, a orientación do local, a entrada de luz natural ou a eficiencia dos sistemas de calefacción e refrixeración poden ter un peso importante nos gastos enerxéticos.
Estes exemplos demostran que un mesmo local pode resultar adecuado para unha actividade e necesitar importantes adaptacións para outra.
Por iso, antes de formalizar un contrato de alugueiro ou compravenda, convén comprobar a potencia dispoñible, o estado da instalación eléctrica e a súa capacidade para soportar os equipos que se van utilizar.
Tamén é recomendable analizar se serán necesarias adaptacións ou ampliacións da instalación, xa que poden supoñer un investimento adicional e atrasar o inicio da actividade.
O illamento e a orientación tamén inflúen nos custos
As características construtivas do inmoble condicionan a cantidade de enerxía necesaria para manter unhas condicións adecuadas de temperatura e confort.
Un local con grandes superficies acristaladas, por exemplo, pode aproveitar mellor a luz natural, pero tamén necesitar protección solar ou climatización adicional durante determinadas épocas do ano.
A orientación, o estado das fiestras, o illamento da cuberta e das paredes ou os sistemas de ventilación son aspectos que paga a pena revisar.
Estas características poden ter especial importancia en negocios con horarios prolongados ou nos que a temperatura interior resulta fundamental para desenvolver a actividade.
Cinco comprobacións antes de escoller un local
Para incorporar a enerxía á decisión, resulta útil realizar unha pequena revisión previa:
- Solicitar información sobre os consumos anteriores, cando existan datos representativos dunha actividade comparable.
- Comprobar o estado da instalación eléctrica e se responde ás necesidades previstas.
- Revisar os sistemas de climatización e ventilación, así como a súa antigüidade e mantemento.
- Analizar o illamento, a orientación e a iluminación natural do inmoble.
- Calcular os investimentos necesarios para adaptar as instalacións á nova actividade.
Cómpre ter en conta que o consumo do anterior ocupante non sempre será representativo, especialmente cando cambian os horarios, os equipamentos ou o tipo de negocio.
Escoller ben tamén significa pensar a longo prazo
O custo real dun local non se limita á renda mensual ou ao prezo de adquisición. Os gastos de funcionamento, as posibles reformas e a capacidade das instalacións para adaptarse ao crecemento da empresa tamén forman parte da decisión.
Comparar diferentes inmobles tendo en conta estes factores permite realizar unha valoración máis completa e reducir o risco de asumir custos que inicialmente non estaban previstos.
A eficiencia enerxética comeza, en moitos casos, antes de abrir a porta do negocio. Unha elección ben planificada pode traducirse en menores gastos, maior confort e unhas instalacións mellor preparadas para o futuro.
A Oficina Económica de Galicia pon á disposición de empresas profesionais un asesoramento personalizado e gratuíto, para poder acompañalas na mellora da organización, a xestión de persoas e o desenvolvemento dos seus equipos.
