Nunha pequena ou mediana empresa, o equipo humano é un dos recursos máis valiosos. Cada persoa achega a súa experiencia, visión e forma de traballar, e cando estas diferenzas están ligadas á idade, falamos de equipos interxeracionais. A convivencia entre diferentes xeracións nunha mesma empresa, desde persoas veteranas ata novas incorporacións da Xeración Z, ofrece unha oportunidade única para sumar coñecemento, innovación e adaptabilidade. Saber xestionar esa diversidade é clave para acadar un ambiente laboral máis rico e produtivo.
O valor do talento sénior
As persoas maiores de 50 ou 55 anos seguen sendo un activo fundamental no tecido produtivo galego. Con décadas de experiencia ás súas costas, coñecen a fondo o sector, o mercado, a clientela e a propia historia da empresa. A súa capacidade para resolver problemas, prever riscos e transmitir coñecemento é un recurso estratéxico que moitas veces se desaproveita por falta de políticas de xestión adaptadas.
Apostar polo talento sénior nas pemes significa:
- Evitar a perda de coñecemento clave.
- Dar estabilidade aos equipos.
- Mellorar a toma de decisións con visión a longo prazo.
- Fomentar o acompañamento de novas incorporacións.
Ideas prácticas:
- Crear roles de mentoría interna.
- Aproveitar o seu coñecemento para formar a outros compañeiros.
- Implicalos en procesos de mellora continua e revisión de procedementos.
A incorporación das xeracións máis novas
As xeracións máis novas, como a Xeración Z (nados a partir de 1996) ou a Xeración Alpha, chegan ao mundo laboral con novas expectativas, competencias dixitais avanzadas e unha visión moi diferente do traballo e das relacións laborais.
Estas persoas valoran a flexibilidade horaria e a conciliación, prefiren culturas colaborativas e horizontais, apostan polo impacto social e medioambiental das empresas e teñen unha gran capacidade de aprendizaxe e adaptación tecnolóxica.
Que poden facer as pemes galegas?
- Crear espazos onde poidan propoñer ideas e melloras.
- Potenciar a súa implicación en proxectos de transformación dixital.
- Fomentar a súa formación e evolución dentro da empresa, sen encasillalos.
Formación cruzada: aprendizaxe entre xeracións
Unha das formas máis efectivas de poñer en valor a diversidade xeracional é promover a aprendizaxe cruzada. As persoas máis novas poden ensinar o uso de novas ferramentas dixitais, mentres que o persoal sénior pode transmitir metodoloxías, coñecementos do sector ou habilidades sociais clave.
Este tipo de formación bidireccional:
- Reforza o sentimento de equipo.
- Reduce prexuízos e mellora a comunicación interna.
- Axuda a adaptar a empresa aos cambios sen perder a súa esencia.
- Propostas concretas:
- Crear parellas ou grupos interxeracionais para proxectos específicos.
- Facer xornadas de “intercambio de competencias”.
- Estimular espazos de diálogo onde todas as xeracións poidan expresar as súas ideas.
En definitiva, a diversidade de idades nas pemes non é un problema a xestionar, senón unha oportunidade a potenciar. Cada xeración achega valores, visións e competencias complementarias polo que apostar pola xestión interxeracional é construír equipos máis fortes, máis adaptables e máis capaces de enfrontar os retos actuais e futuros.
Na Oficina Económica de Galicia animamos ás empresas a desenvolver políticas que recoñezan e potencien esta riqueza xeracional, como parte dunha estratexia centrada nas persoas, na innovación e no crecemento sostible.
