Dentro dos múltiples retos financeiros que un emprendedor atopa, hai dous que destacan pola importancia e o desafío que supoñen: como poñerse en marcha e como seguir crecendo unha vez que se arrancou. Hoxe falaremos do primeiro deles.
Ao poñer en marcha un novo proxecto, mesmo para empresarios experimentados, o maior obstáculo pode ser a financiación. E en moitos casos, os fondos necesarios para arrincalo só poderán proceder dos aforros persoais, froito de anos de esforzo e sacrificio. Non obstante, as oportunidades de negocio non sempre chegan no momento ideal, cando os fondos xa están dispoñibles, e unha gran idea pode perderse se non se consegue financiación externa a tempo.
Conseguir financiamento tradicional non é nada doado. E aínda que existen programas públicos e subvencións, estes están cheos de requisitos, prazos longos e criterios moi específicos. E, por outra banda, a banca esixe avales, garantías, unha longa lista de documentos e, mesmo tras semanas de espera, non sempre dan unha resposta favorable. É certo que contar co apoio dunha consultoría ou un xestor especializado permite navegar estes procesos con maior éxito, pero, mesmo así, moitos emprendedores acaban desanimados ao ver como unha boa idea se frena por factores que pouco teñen que ver co potencial real do proxecto.
É neste punto onde coñecer e explorar as fontes alternativas de financiación pode marcar a diferenza entre aproveitar unha oportunidade ou ver como outra persoa pon en marcha esa mesma idea. E no mundo das pemes xa xurdiron ferramentas que antes parecían exclusivas de start-ups tecnolóxicas de Silicon Valley, Pequín ou Cambridge, pero que hoxe están ao alcance de calquera empresario, mesmo desde o móbil.
Para os novos proxectos aparece como gran oportunidade as plataformas de crowdfunding. Estas demostraron ser especialmente eficaces para ideas innovadoras, proxectos sociais ou produtos creativos, onde o entusiasmo colectivo xoga un papel fundamental.
O crowdfunding é un mecanismo de captación de fondos privados que aproveita a visibilidade do entorno dixital. Plataformas como GoFundMe, Kickstarter ou Crowdcube fan de ponte entre quen necesitan capital e quen están dispostos a apoiar proxectos nos que cren. A cambio dunha comisión polo servizo, se se alcanzan os obxectivos de recadación os fondos quedan dispoñibles na súa totalidade para o uso do propósito anunciado.
Se o teu proxecto xera entusiasmo, ten un compoñente tecnolóxico, ou cres que podería atraer a moitas persoas se tivesen a oportunidade de coñecelo, esta modalidade é perfecta para ti.
Agora ben, e se o teu negocio xa está en marcha e o que necesitas é outro tipo de produtos financeiros, mesmo se iso implica asumir un custe polos fondos recibidos? Para estes casos, as fintech representan unha excelente opción.
Emprender sen o apoio da banca tradicional é posible, pero require coñecer ben as alternativas dispoñibles e actuar con determinación. Iniciativas como o crowdfunding permiten dar os primeiros pasos cando o acceso ao crédito parece bloqueado, ofrecendo unha vía directa, flexible e dixital para validar unha idea e obter os recursos necesarios. Aproveitar estas ferramentas non só supón unha solución financeira, senón tamén unha oportunidade para conectar co público, validar o interese do mercado e crear comunidade en torno a un proxecto.
Se necesitas axuda neste ámbito, podes solicitar o asesoramento gratuíto que ofrecemos desde a Oficina Económica de Galicia. O único que tes que facer é cubrir un formulario en liña e unha persoa experta porase en contacto contigo.
