Tes unha idea clara, o equipo e o financiamento necesarios para crear a túa startup? Se é así, o seguinte paso esencial é formalizar a súa constitución legal. Este proceso non só dota á túa empresa de personalidade xurídica, senón que tamén che abre as portas a múltiples beneficios e axudas públicas.
A continuación, detálloche os pasos fundamentais que debes seguir para constituír legalmente a túa startup.
1. A constitución da empresa
O primeiro que tes que facer é escoller a forma xurídica máis adecuada para o teu proxecto, podendo optar por unha Sociedade Anónima, unha Sociedade Limitada ou outra opción legalmente recoñecida. Unha vez tomada esta decisión, sigue estes pasos:
- Solicitude do certificado de denominación social : Debes reservar o nome da túa futura sociedade telematicamente no Rexistro Mercantil Central (www.rmc.es). Podes propoñer ata cinco opcións de nome, que se asignarán por orde segundo estean dispoñibles. Este trámite ten un custo aproximado de 20 €.
- Obtención do CIF provisional : Na Delegación de Facenda do lugar onde vai estar o domicilio social, solicítase o Código de Identificación Fiscal provisional. Para facelo, terás que presentar un escrito, asinado por ti e os demais socios, comprometéndovos a constituír a sociedade, xunto cun modelo de estatutos e escritura de constitución, máis toda a documentación esixida.
- Apertura dunha conta bancaria a nome da sociedade : Nesta conta realizarás os ingresos das achegas dos socios para constituír a empresa. O banco emitirache unha certificación dos ingresos realizados, imprescindible para os seguintes pasos.
- Outorgamento da escritura pública de constitución ante notario : Deberás asinar a escritura de constitución, que inclúe os estatutos sociais. Para isto é necesario presentar o certificado de reserva do nome, o CIF provisional e a certificación bancaria dos ingresos.
- Inscrición no Rexistro Mercantil da provincia : Presentarás a escritura pública de constitución e a liquidación do imposto correspondente (modelo 600). O rexistrador comprobará que todo estea en orde e permitirá a inscrición definitiva da empresa.
2. Cualificación IEBT en Galicia
Se o teu proxecto ten un claro compoñente tecnolóxico e innovador, podes solicitar a cualificación como Iniciativa de Emprego de Base Tecnolóxica (IEBT) en Galicia. Para iso, o proxecto debe ser viable, innovador e prever a creación de emprego estable en Galicia, ademais de que polo menos o 25% do persoal teña titulación universitaria.
Este proceso require que elabores unha memoria técnica e económica, que será revisada por persoal técnico das tres universidades galegas. A solicitude preséntase telematicamente na sede electrónica da Xunta (procedemento TR340D).
3. Certificación de startup de ENISA
Para beneficiarte das vantaxes da Lei de Startups, a túa empresa debe obter a certificación oficial de ENISA (Empresa Nacional de Innovación). Para acceder a esta certificación, a túa startup debe cumprir os seguintes requisitos:
- Ser unha empresa de nova creación.
- Non repartir dividendos nin cotizar en bolsa.
- Ter polo menos un 60% da plantilla con contrato laboral en España.
- Desenvolver un proxecto innovador cun modelo de negocio escalable.
- Non superar un volume de negocio anual de 10 millóns de euros.
Con esta certificación poderás acceder a diversas axudas e beneficios que impulsarán o teu emprendemento innovador.
Se en calquera momento precisas axuda ou asesoramento experto para formalizar a túa startup, non dubides en contactar coa Oficina Económica de Galicia, que ofrece asesoramento gratuíto para persoas emprendedoras coma ti.
