A comunicación corporativa é un activo estratéxico para calquera empresa, pero nas pemes adoita ser vista como algo secundario. Con todo, unha mensaxe pouco clara, unha ausencia de estratexia ou unha mala xestión da imaxe pode ter consecuencias negativas: perda de clientes, desmotivación interna ou incluso unha reputación danada. Coñecer os erros máis comúns é o primeiro paso para corrixilos e mellorar.
1. Non ter unha estratexia definida
Moitas pemes comunican “sobre a marcha”, sen un plan nin obxectivos claros. Isto provoca mensaxes inconexas e unha falta de coherencia na imaxe da empresa. A mellor maneira de evitalos é elaborar un plan de comunicación sinxelo, con obxectivos concretos, públicos definidos e canles claras (web, redes sociais, medios de comunicación, etc.).
2. Descuidar a comunicación interna
Pensar que só importa a comunicación cara a fóra é un erro. Se os equipos non están informados, é imposible transmitir mensaxes consistentes ao mercado. Para elo deben establecerse canles de comunicación interna (reunións periódicas, boletíns, ferramentas colaborativas) e fomentar unha cultura de transparencia.
3. Falta de coherencia na imaxe de marca
É habitual que as pemes usen logotipos distintos, mensaxes contraditorias ou ton pouco profesional segundo a canle o que resta credibilidade. Pode evitarse facerdo un manual de identidade corporativa (aínda que sexa básico) e aplicar un estilo uniforme en todos os soportes.
4. Comunicar só cando hai un problema
Moitas empresas lembran a importancia da comunicación unicamente en momentos de crise, cando xa é demasiado tarde. O ideal é sempre manter unha comunicación constante que dea visibilidade aos logros, proxectos e valores da empresa, non só cando hai dificultades.
5. Ignorar as redes sociais ou xestionalas de forma improvisada
Publicar contidos sen planificación, copiar a competencia ou abandonar as redes transmite desorganización. Por iso, contar cun calendario editorial, adaptado á realidade da empresa, e apostar pola calidade fronte á cantidade.
6. Non escoitar aos clientes nin aos empregados
A comunicación é bidireccional. Cando unha empresa non presta atención ás opinións, críticas ou suxestións, perde oportunidades de mellora. É moi importante habilitar canles de feedback (enquisas, atención en liña, reunións) e demostrar que as aportacións se teñen en conta.
En definitiva a comunicación corporativa non é só para grandes empresas. As pemes galegas tamén poden (e deben) coidala se queren gañar visibilidade, reforzar a súa reputación e mellorar a confianza de clientes e equipos. Evitar estes erros comúns e implantar boas prácticas é un investimento estratéxico que ten un impacto directo na competitividade. Se precisas máis información ou asesoramento ponte en contacto coa Oficina Econónmica de Galicia.
